الداعى ۋاقىتتا جىلىنا 500 ميلليون كۆ/ساع-تان استام ەلەكتر قۋاتىن وندىرەتىن جوبانى Eurasian Resources Group (ERG) ىسكە اسىردى. سونداي-اق وسى جەس-ى جىل سايىن 440 مىڭ تونناعا دەيىن كومىرقىشقىل گازى شىعارىندىلارىنىڭ الدىن الىپ, 300 مىڭ توننادان استام كومىردى ۇنەمدەۋگە مۇمكىندىك بەرەدى. ايتا كەتۋ كەرەك, 2024 جىلدىڭ جەلتوقسانىندا حرومتاۋ جەس-نىڭ العاشقى ەكى قوندىرعىسى ەلەكتر قۋاتىن وندىرە باستاسا, 2025 جىلدىڭ 1 قاڭتارىندا العاشقى ميلليون كۆ/ساع بەردى. بۇگىندە بارلىق تۋربينالار قوندىرىلىپ ءبىتتى.
حرومتاۋ اۋدانىندا وتكەن سالتاناتتى راسىمگە اقتوبە وبلىسىنىڭ اكىمى اسحات شاحاروۆ, ERG ديرەكتورلار كەڭەسىنىڭ توراعاسى, باس اتقارۋشى ديرەكتورى شۋحرات يبراگيموۆ قاتىستى, دەپ حابارلايدى egemen.kz.
«ادىلەتتى قازاقستان: زاڭ مەن ءتارتىپ, ەكونوميكالىق ءوسىم, قوعامدىق وپتيميزم» اتتى پرەزيدەنت جولداۋىنا سايكەس, اقتوبە وبلىسىندا دا ينۆەستيتسيالار مەن يننوۆاتسياعا, زاماناۋي ءوندىرىستى دامىتۋعا باسىمدىق بەرىلىپ كەلەدى. وڭىردە نەگىزگى كاپيتالعا سالىنعان ينۆەستيتسيا كولەمى جىل باسىنان بەرى 590,1 ملرد تەڭگەگە جەتىپ, وتكەن جىلدىڭ وسى كەزەڭىمەن سالىستىرعاندا, 52,7 %-عا ءوستى. بۇل كورسەتكىشتەر اقتوبە وبلىسىنىڭ جوعارى ينۆەستيتسيالىق الەۋەتىن جانە بيزنەس تاراپىنان سەنىمنىڭ ارتىپ كەلە جاتقانىن كورستەتەدى ال, «حرومتاۋ» جەل ەلەكتر ستانتسياسىندا 25 جاڭا جۇمىس ورنى اشىلادى», دەپ اتاپ كورسەتتى ءوڭىر باسشىسى اسحات شاحاروۆ. 
«بۇگىن ERG-نىڭ العاشقى جەل ەنەرگەتيكاسى جوباسى اقتوبە وبلىسىندا ىسكە اسىرىلعانىنا كۋا بولىپ وتىرمىز. «حرومتاۋ» جەس-ى –قازاقستانداعى جاڭارتىلاتىن قۋات كوزدەرىنىڭ ۇلەسىن ارتتىرۋ ماقساتىندا ءبىزدىڭ قوسقان ۇلەسىمىز. جوبانى ERG Capital Projects كومپانياسى قازاقستاننىڭ دامۋ بانكىنىڭ قارجىلىق قولداۋىمەن ىسكە اسىردى. قۇرىلىسقا قۇيىلعان ينۆەستيتسيا كولەمى –74 ميلليارد تەڭگەدەن استى. ERG ارقاشان ESG قاعيداتتارىنا سۇيەنىپ جۇمىس ىستەيدى. الەمدە جوعارى ساپاسىمەن تانىلعان حروم كەنىن ءبىز ەكولوگيالىق تۇرعىدان تازا وندىرە وتىرىپ, بۇرىنعىدان دا باسەكەگە قابىلەتتىرەك ەتۋگە تىرىسامىز. وسىلايشا ERG مەتاللۋرگيانى بولاشاقتىڭ اجىراماس بولىگىنە اينالدىرادى», دەپ اتاپ كورسەتتى ERG ديرەكتورلار كەڭەسىنىڭ توراعاسى, باس اتقارۋشى ديرەكتورى شۋحرات يبراگيموۆ سالتاناتتى راسىمدە. جەس «قازحروم» تۇك» اق قۇرامىنداعى ءدوڭ تاۋ-كەن بايىتۋ كومبيناتىنىڭ ماڭىندا سالىندى.
2023 جىلى دەكاربوندەندىرۋ ستراتەگياسىن ازىرلەگەن ERG تاياۋدا ەنەرگەتيكا ديۆيزيونىنا كىرەتىن بولدى. ول دۋبايدا وتكەن COP 28 بۇكىلالەمدىك كليمات سامميتىندە تانىستىرىلعان. وسى ستراتەگيا اياسىندا جالپى ينۆەستيتسيا كولەمى 300 ملن اقش دوللارىن قۇرايتىن جوبالار جۇزەگە اسىرىلۋدا. تەمىر كەنى ديۆيزيونىندا قاشار جىلۋ ورتالىعى گازعا اۋىستىرىلسا, الليۋميني ديۆيزيونىندا بۋدى تۇتىنۋدى ازايتۋ باعدارلاماسى ەنگىزىلۋدە, جاڭا كالتسيناتسيا پەشتەرى مەن قاراشىرىندى ءوندىرىسىن جەتىلدىرۋ جۇمىستارى ءجۇرىپ جاتىر. سونداي-اق اقتوبە فەرروقورىتپا زاۋىتىندا قايتالاما قۋات كوزدەرىن ەلەكتر توگىنا اينالدىراتىن ستانتسيا سالىنىپ جاتىر.
«قازاقستاننىڭ دامۋ بانكى ەلىمىزدەگى جاڭارتىلاتىن ەنەرگەتيكا سالاسىنداعى جوبالاردى قارجىلاندىرۋعا باسىمدىق بەرەدى. ءبىز وسىلايشا ەلدىڭ دەكاربونيزاتسيا ماقساتتارىنا جانە ەنەرگەتيكالىق قاۋىپسىزدىگىن قامتاماسىز ەتۋگە ۇلەس قوساتىن جاڭا گەنەراتسيا كوزدەرىنىڭ قۇرىلىسىن قولدايمىز. «حرومتاۋ» جەس دامۋ ينستيتۋتتارى مەن بيزنەستىڭ بىرىگىپ, قازاقستاننىڭ «جاسىل» ەكونوميكاسىنىڭ نەگىزىن قالايتىن اۋقىمدى جوبالاردى جۇزەگە اسىرىپ جاتقان كورسەتەدى», دەيدى قازاقستاننىڭ دامۋ بانكى باسقارما توراعاسى مارات ەلىباەۆ.
اقتوبە وبلىسى
